Хятадын дарга Ши Жиньпин 11 дүгээр сарын 07-нд Дэлхийн сонгодог утга урлагийн судлалын анхдугаар чуулганд мэндчилгээ дэвшүүлжээ.
Ши Жиньпин хэлэхдээ, сонгодог соёл иргэншлүүд одод мэт гялалзаж, ирээдүй хойч үедээ оюун санааны эх ундарга болсоор ирсэн. 2000 гаруй жилийн өмнө Хятад, Грек гэсэн хоёр агуу соёл иргэншил Ази, Европын эх газруудын хоёр захад хөгжин, хүн төрөлхтний соёл иргэншлийн хөгжилд суурь хувь нэмэр оруулсан билээ. Энэ удаа Хятад, Грек хоёр орон хамтран Дэлхийн сонгодог утга урлагийн судлалын анхдугаар чуулганыг зохион байгуулж, Афин хотод Хятадын сонгодог соёл иргэншлийн судалгааны хүрээлэнг байгуулсан нь хоёр орны болон дэлхийн бусад улс орнуудын соёлын солилцоо, харилцан туршлага зээлдэх шинэ тавцан болсон юм.
Хятад улс соёл иргэншлийн өв уламжлал, хөгжлийг идэвхтэй дэмжиж, дэлхийн улс орнуудын соёлын солилцоог бэхжүүлэн, соёл иргэншлийн харилцан яриаг өргөжүүлэхийг чухалчилдаг. Түүнчлэн улс орнуудын соёл иргэншлээс ухаарал, мэдлэг олж авах, оюун санааны шим тэжээлийг шингээхэд анхаарч, хүн төрөлхтний өмнө тулгарч буй сорилтуудыг хамтран шийдвэрлэх, соёл иргэншлийн хөгжил дэвшлийг урагшлуулахад бэлэн байна. Эрдэмтэн судлаачид сонгодог утга урлагийн судалгааны эрхэм зорилгоо биелүүлж, соёл иргэншлийн өв залгамжлал, хөгжлийг ахиулан, соёлын солилцоо, харилцан суралцах үйлсэд үнэтэй хувь нэмэр оруулна гэдэгт итгэлтэй байна гэжээ.
“Сонгодог соёл иргэншил ба орчин үеийн дэлхий” сэдэвт Дэлхийн сонгодог утга урлагийн судлалын анхдугаар чуулган мөн өдөр Бээжинд нээгдэв. Уг хурлыг Хятадын Нийгмийн Шинжлэх Ухааны Академи, Хятадын Боловсролын Яам, Хятадын Соёл, аялал жуулчлалын яам, Грекийн Соёлын яам, Афины Шинжлэх Ухааны Академи хамтран зохион байгуулжээ.
