Нараар наадаж, хураар аргадсан наадмын өглөө нэг л өөр, өвөрмөц ганган эхэлнэ. Мандах алтан нарнаас эхлээд хээ хуар, өнгө донж зохицсон ганган дээлээрээ гоёно. Өвгөд хөгшид нь ч хөл нь хөнгөрөн "Эрүүл явбал наадам үзнэ" гэж ярьцгаана, бэлгэшээнэ. Хурдан морь унах хүүхдүүд наран доор нар зөв эргэн уяагаа тойрон гийнгоолно. Залуус бүгд л барилдах ааг омог нь бадарна. Сэтгэлт бүсгүйтэйгээ сумын наадмаар уулзах болзоо тавина.

07-р сарын 25-нд болох Зүүн Үзэмчин хошууны Ээжнуур сумын Хараат багийн ардын наадмын товыг харангуут наадам үзэхээр нутгийн зүг хөдөллөө. Энэ жил зуншлага сайтай болохоор малчдын сэтгэл тэнүүн, малын зоо тэнэгэр.

Наадам үзээгүй удсаных ч юм уу сэтгэл гэгэлзээд наадмын өмнөх оройноос нь дээл, гутал цуглууллаа. Ээжийн ягаан дээл, дүүгийн гутал  хэмжээ дамжаа, өнгө донж нь  ян цав тохирлоо.

Наадмын өглөө яг л хүүхэд багын үе шигээ сэтгэл догдолно. Эртлэн босоод ажлын хэдтэйгээ наадмын талбайг зорьлоо. Замын турш бороо шивэрч байснаа яг талбайд нь очиход бороо ч татарч тэнгэр онгойх маягтай болов. Нар, хур тэгширсэн наадмын өнгө энэ жил дэлгэр сайхан байгааг наадамчин олны царай төрх, инээд баяр, дээл хувцас, наадмын нээлтэд орохоор хүлээн зогссон хүчит бөхчүүд, шандаст хүлгүүд, нум сум, шагайн харваачид, багийн малчдын сүр жавхаа, тайз, уран бүтээлчид, агаарт нисэх дрон гээд л бүгд бүрэлдэн бүрэн цогцолно.

Наадмын торгон агшныг гэрэл зургаар толилуулья.