ГХЯ-ны Төрийн нарийн бичгийн дарга Л.Мөнхтүшиг 08 дугаар сарын 30-нд БНХАУ-ын ӨМӨЗО-ны дэд тэргүүлэгч Бао Шэньхуа тэргүүтэй төлөөлөгчдийг хүлээн авч уулзлаа.
Уулзалтын үеэр Төрийн нарийн бичгийн дарга Л.Мөнхтүшиг дэд тэргүүлэгчийн Монгол Улсад хийж буй ажлын айлчлалд амжилт хүсэж, Монгол, Хятадын иж бүрэн стратегийн түншлэлийн харилцааг өргөжүүлэн хөгжүүлэхэд ӨМӨЗО чухал байр суурь эзэлдэг болохыг онцлов.
Талууд хоёр талын худалдаа, эдийн засгийн хамтын ажиллагааг нэмэгдүүлэхэд чухал үүрэг гүйцэтгэх Замын-Үүд-Эрээний эдийн засгийн хамтын ажиллагааны бүсийн бүтээн байгуулалтыг эрчимжүүлэх, Монгол-Хятадын экспогоор дамжуулан Монгол Улсаас БНХАУ-д экспортлох бараа бүтээгдэхүүний нэр төрлийг олшруулах талаар санал солилцов.
Дэд тэргүүлэгч Бао Шяньхуа монголын талаас дэвшүүлж буй ажил хэрэгч бодит хамтын ажиллагааны саналыг дэмжиж хамтран ажиллахаа илэрхийлэхийн зэрэгцээ Монгол Улсад хийж буй айлчлалын хүрээнд хоёр талын боловсрол, шинжлэх ухааны салбарын хамтын ажиллагааг шинэ шатанд гаргахад чухал түлхэц үзүүлэх хэд хэдэн эрх зүйн баримт бичиг байгуулж буйг танилцуулж, цаашид Монгол, Хятадын харилцаа, хамтын ажиллагаанд ӨМӨЗО үргэлжлүүлэн хувь нэмрээ оруулахаа илэрхийлэв.
